БИШКЕК, 11-июнь — Sputnik. НАТОнун өкүлчүлүгү Кыргызстанда ачыла турган болсо, анын чыныгы максаты так, даана аныкталыш керектигин эксперт, профессор Нурбүбү Асипова Sputnik сайтынын кабарчысына билдирди.
Анын айтымында, 2011-жылдан баштап Кыргызстанга НАТОнун өкүлчүлүгүн ачуу маселеси көтөрүлүп келет.
Асипова НАТОнун келгендеги негизги миссиялары эмнеге байланыштуу болот, ошону ачык тактоо керектигин кошумчалады. Бир жагында Россиянын блогу, экинчи жагында НАТОнуку турса кандай болот деген түрдүү пикирлер коомчулукта болушу мүмкүн дейт ал.
"Кандайча иштейт? Кандай иш алып барат? Ушундай нерселерин тактап, элге түшүндүрүү иштерин жүргүзбөсө, эл каршы да болушу мүмкүн. Албетте, ар бир эл аралык уюмдун өзүнүн миссиясы бар. Алар менен кошо жакшы нерсе келеби же жаман нерсе келеби, так түшүнүп алуу керек", — деди серепчи.
Ал өз сөзүндө НАТОнун гуманитардык долбоорлору өлкөгө жардам бериши мүмкүндүгүн айтып, аскердик кызматташтык жагына келгенде, Кыргызстан өтө терең ойлонуш керектигин баса белгиледи.
