БИШКЕК, 20 мая — Sputnik. Екатеринбургда набыт болгон кыздын сөөгү Кыргызстанга жеткириле турганын Тышкы иштер министрлигинин басма сөз кызматы маалымдады.
Шаршемби күнү парламент жыйынында "Ар-Намыс" фракциясынын депутаты Каныбек Осмоналиев 15 күн мурун Кыргызстандан барган эки кызды "токойго алып барып асып салышканын", кыздардын сөөгү көмүлбөй калганын билдирген.
Буга чейин аталган жаран тууралуу Башкы консулдуктун эч кандай кабары болгон эмес, кыздын жарандыгы такталбагандыктан, РФ тийиштүү органдары расмий билдирүү жасаган эмес. Ага-туугандарынан да кыздын жоголгундугу жөнүндө кайрылуу түшкөн эмес.
2015-жылдын 18-майында кыздын ата-энеси Башкы консулдукка кайрылып, эксгумацияланган сөөктү алып кетүүгө жардам көрсөтүү өтүнүчү менен кайрылды.
Башкы консулдук Екатеринбургдагы кыргыз диаспорасынын өкүлдөрү менен биргеликте сөөктү Кыргызстанга жеткирүү боюнча тийиштүү аракеттерди көрүүдө.
Экинчи асылган кыз жөнүндө Башкы консулдукта да, кыргыз диаспорасында да эч кандай маалымат жок.
