БИШКЕК, 24-апр. — Sputnik. КСДП фракциясынын лидери Чыныбай Турсунбеков азыркы өкмөттүн айланасындагы абалга байланыштуу коалициянын таркап-таркабашы, "Ар-Намыс", "Ата Мекен" фракцияларына байланыштуу экендигин айтты.
Жогорку Кеңештин КСДП фракциясынын лидери Чыныбай Турсунбеков өкмөт башчылыгына талапкерлер боюнча коомчулукта айтылып жаткан адамдардын ар бири боюнча жакында фракциянын жыйынын өткөрүп, ар бир талапкерди талкуулай тургандыгын маалымдады.
Ал коалициядагы өнөктөштөрү "Ар-Намыс", "Ата Мекен" менен кеңешүүнү туура көрүп жаткандыгын кошумчалады.
"Алардын да пикирлерин угуп, өзүбүздүн сунуштарыбызды даярдап, анан кийин бир–эки адамга токтолобуз деп турабыз. Айтылып жаткан талапкерлердин ичинен же жаңы талапкер чыгып калышы мүмкүн", — деди Чыныбеков.
Парламенттеги Коалициялык көпчүлүктүн таркап-таркабаш боюнча суроого жооп берип, коалициядагы фракциянын (КСДП, "Ар-Намыс", "Ата Мекен") жетекчиси тең бул маселе боюнча бир пикирге келгендигин айтты.
"Эгерде кимдир бирөө ошол пикирден айнып кетпесе, коалиция тарабайт. Айнып кетсе, коалиция таркашы ыктымал. КСДП фракциясы макулдашкан пикирден баш тартпайт", — деди Турсунбеков.
Фракция лидери өкмөттүн азыркы курамы өзгөрүшү мүмкүндүгүн кошумчалады.
