БИШКЕК, 24-апр. — Sputnik. Чүй облусундагы Шамшы капчыгайында өтүп жаткан ШКУ мамлекеттеринин атайын даярдыктагы аскерлеринин машыгуулары учурунда өрт чыкканын Sputnik сайтынын кабарчысы окуя болгон жерден билдирди.
Башкы штабдын маалымат кызматынан маалымдагандай, ШКУ мамлекеттеринин атайын даярдыктагы аскерлеринин биргелешкен машыгуулары Токмок шаарындагы аскер бөлүгүндө өтүп жатат. Аскерлердин бир бөлүгү машыгууну аталган шаарда өткөрүп жатса, экинчи топ Шамшы капчыгайында өткөрүүдө
Өрт белги берүүчү ракетадан кокус тутанып, ал учурда өчүрүлгөндүгүн башкы штабдагы булак билдирди.
Машыгуулар 21-апрелден 25-апрелге чейин Токмок шаарындагы 52806-аскер бөлүгүндө өтүүдө. ШКУга мүчө мамлекеттердин аскер күчтөрү туткундарды куткаруу, мыйзамсыз түзүлгөн топторду тоо шартында жок кылуу ыкмаларын бирге өздөштүрүүдө.
Шанхай кызматташтык уюму 2001-жылы Кытай, Россия, Казакстан, Тажикстан, Кыргызстан жана Өзбекстан мамлекеттиринин лидерлери тарабынан түзүлгөн. Өзбекстан мамлекетинен сырткары калган бардык мамлекеттер 1996-жылы түзүлгөн "Шанхай бешилтигинин" мүчөсү. Бул уюм аскер тармагында биргелешкен иш-чараларды өткөрүү, бири-бирине болгон ишенимди чыңдоо жана чек ара аймактарында аскер күчтөрүн өз ара түшүнүүчүлүк менен азайтуу жаатында кызматташат.
