БИШКЕК, 14-апр. — Sputnik. КРдин вице-премьер-министри Абдырахман Маматалиев КРдин Каржы министрлигинин, Мамлекеттик чек ара кызматынын жана КР Өкмөтүнүн Аппаратынын түзүмдүк бөлүмчүлөрүнүн жетекчилеринин катышуусунда Кыргызстандын Мамлекеттик чек ара кызматынын жана Россиянын тийиштүү маморганы ортосундагы республиканын ЕАЭБге кошулуу алкагында кыргыз мамлекеттик чек ара тилкесин техникалык жана инженердик жабдууга көмөк көрсөтүү жөнүндө келишим долбоорун талкуулоо боюнча кеңешме өткөрдү. Бул тууралуу өкмөттүн маалымат кызматы билдирет.
Каржы министрлиги жана Мамлекеттик чек ара кызматы вице-премьер-министрге аталган долбоор боюнча аткарылган иштер тууралуу маалымат берди.
Келишим долбоору Кыргызстандын Мамлекетик чек ара кызматы жана Каржы министрлиги менен биргеликте даярдалып, Россиянын тийиштүү мамлекеттик ведомстволоруна макулдашуу процедураларынан өткөрүү үчүн жөнөтүлгөн.
Вице-премьер-министр Кыргызстандын Бирдиктүү экономикалык биримдикке кошулуусу боюнча Жол картасында пландаштырылган бардык иш-чаралар өз мөөнөтүндө аткарылышы тийиштигин белгиледи.
"Келишим долбоорун иштеп чыгууну үстүбүздөгү жылдын 15-апрелине дейре жыйынтыктоо зарыл, өлкөнүн ЕАЭБке кирүүсүнө дейре, башкача айтканда, үстүбүздөгү жылдын 9-майына дейре келишим бардык тийиштүү ички мамлекеттик процедуралардан өтүүсү керек, тактап айтканда, аталган долбоор Жогорку Кеңештин тийиштүү комитеттеринде макулдаштыруу процедураларынан өтүүгө тийиш", — деп белгиледи Абдырахман Маматалиев.
