БИШКЕК, 10-апр. — Sputnik. Россиялык рубль туруктуу бекемделүү багытында жана ал мындан ары дагы өсөт деп билдирди Sputnik кабарчысына эл аралык экономика боюнча эксперт, БГУнун социалдык-маалымат технологиялар кафедрасынын башчысы Кеңешбек Алимбеков.
КРдин Улуттук банкынын расмий статистикасына ылайык, орус валютасынын Кыгрызстандын каржы рыногундагы баасы 1,15 сомго чейин өстү. Акча алмаштыруу жайларында ал 1,2 сомго жетти.
Алимбековдун айтымында, рублдун туруктуулугуна Россиянын санкциялар боюнча маселелерди чечиши таасир кылды. Ал импорт каатчылыгын өзү менен кызматташууга даяр башка өлкөлөрдүн эсебинен чече алды.
"Мунай менен газдын баасынын көтөрүлүшү да дагы бир оң фактор болду. РФ мунай-газ саясатынан көз каранды жана анын өзгөрүшү салттуу түрдө Россиянын экономикасына оң таасирин тийгизет", — дейт ал.
Рубль баасынын өсүшү РФтеги кыргыз мигранттар үчүн да жакшы болот, себеби алар мурдагыдай эле көлөмдөгү акчаларды которо алышат.
Кеңешбек Алимбеков, эгер Россия мындан ары кошумча санкциялар же энергия берүүчүлөрдүн баасы кескин төмөндөшү сыяктуу сырткы терс таасирлерге дуушар болбосо, рубль 1,8 сомго чейин өсөт деп эсептейт.
Мындай пикирге "Кенч Казына" инвестициялык фондунун жетекчиси Умбриэль Темиралиев анча кошулбайт. Анын пикиринде, рублдун бекемдеши убактылуу көрүнүш.
Ал аталган валюта узак мөөнөттүү бекемдеши үчүн валюталык саясатта түзүмдүк өзгөрүүлөр болушу керек, бирок аларды Россия азырынча жүргүзө албайт деп эсептейт.
"Россиянын валютасына таасир кылуучу факторлор дагы эле күчтүү жана бул келечекте бизге да таасир кылат. Буга Россияга каршы санкцияларды жана мунайын баасынын туруксуздугун киргизсе болот", — деди ал.
Темиралиев эл аралык рейтинг жүргүзүүчү агенттиктер 2015-2016-жылдарда россиялык рубль төмөндөйт деп божомолдоп жатканын жана бул анын туруктуугуна сөзсүз таасир кыларын эске салды.
Ал Россия валютасынын баасы кыргыз рыногунда 1,1 — 1,8 сом чегинде болот деп болжойт.
