БИШКЕК, 27-мар. — Sputnik. Ош шаарынын картасына кирген үч жерде жарака бар экендиги турак-жай куруучу жеке секторлорго маалымдалган эмес. Андан сырткары, шаар тургундары пайдалануучу таза суу, ошондой эле саркынды суулар агуучу коммуникациялар да көз жаздымында калган.
"Тилекке каршы ал долбоор өтө чийки иштелип, шаардын демографиялык өсүш динамикасы эске алынбаган. Такталбаган маалыматтарда, шаар тургундарынын саны- 250 миң деп айтылганы менен ички миграцияны эске алганда бул көрсөткүч 500 миңге чамалайт. Бул өңүттөн караганда шаарды жогору карай кеңейтүү максаттуубу, же туурасынан кеңейтүү ылайык болобу деген суроо жаралууда", — деди Ош шаарынын вице-мэри Жапарбек Ормонов башкы пландын долбоорун тегерек столдун катышуучуларына сунуштап жатып.
Ош шаарынын башкы планы 1950-жылдары иштелип чыгып, 1971-жылы бекитилген. Андан соң 1992-жылы иштелип чыгып, бирок, аягына чыкпай, 2007-жылдары кайрадан жетекчиликке алына баштаган. Ошентип, 2011-жылы жергиликтүү бюджеттен 13 млн. сом каражат чыгымдалып, башкы пландын кезектеги долбоору даярдалган.
Буга чейин Ош шаарынын мэри Айтмамат Кадырбаев шаардын башкы планы толук иштелип аягына чыга электигин, аны 2016-жылдын жаз айларында толук бүтүрүүнү пландап жаткандыгын билдирген.
