БИШКЕК, 6-мар. — Sputnik. Ош шаарынын мэри Айтмамат Кадырбаев Ош шаарынын башкы планы толук иштелип аягына чыга электигин, аны 2016-жылдын жаз айларында толук бүтүрүүнү пландап жаткандыгын билдирди.
"Тилекке каршы, шаардын башкы планы бүтө элек экен, быйыл болбосо да 2016-жылдын жаз айларына чейин аны бүтүрүүнү пландап жатабыз. Шаарды кеңейтүү боюнча чаржайыт өскөн тартипти токтотуп, заманбап талаптарга ылайык, туурасынан эмес, тикесинин өстүрүүгө багыт алып, көп кабаттуу, бийик үйлөрдү курууга багыт алышыбыз керек", — деди Кадырбаев.
Шаар башчысы калаанын сырткы көрүнүшү бүгүнкү күндө замандын талабына толук жооп бербестигин айтып, бул багытта бир нече долбоорлорду баштагандыгын маалымдады.
"Ош шаары Кыргызстанда эле эмес, Орто Азия аймагында маданий борборго айланып, ал жашоочулар жана меймандары үчүн жагымдуу болушу керек. Ал үчүн бир топ иштерди жасап баштадык. Мэр болуп келгендигиме бир жылга чукул убакыт болду, бирок, бул кыска убакыт ичинде көп нерсени жасоого мүмкүн эмес. Былтыркы жылдын эсебинен 12, 4 чакырым түнкү жарыктарды орноттук, андан сырткары түстүү жарыктандыруу менен мечитти, музейибизди, Бабурдун үйүн, көркөм галереяларды жабдыдык. Азыр шаарды жакшыртуу, элге жагымдуу кылып жасалгалоо боюнча пландарыбыз бар", — деди мэр.
Ош шаарынын мэр Кадырбаев 2014-жылдын январь айында мурдагы шаар башчысы Мелис Мырзакматовдун ордуна шайланган. Ош шаардык кеңешинин 45 депутатынын 25и Кадырбаевге добушун берген.
