Бишкек, 19-фев. — Sputnik. Аида Салянова "Күчтүү Кыргызстан" партиясын бүгүнтөн тарта жетектеп баштады. Бул туурасында аталган партиянын түптөөчүсү, энергетика тармагы боюнча эксперт болуп жүргөн Расул Умбеталиев Sputnik сайтына билдирди.
Энергетика тармагы боюнча эксперт болуп жүргөн Умбеталиев аталган партия парламенттик шайлоого катышууга даярданып жаткандыгын билдирди.
Эске салсак, аталган партия 2005-жылы "Жарык Кыргызстан" деген ат менен Адилет министрлигинен каттоодон өткөн. 2015-жылы ал "Күчтүү Кыргызстан" деген жаңы ат менен кайра катталып, жаңы уставы түзүлгөн.
Өз ыктыяры менен кызматтан кеткен Аида Салянова маалымат жыйынында күзүндө боло турчу парламенттик шайлоого бара турганын айтып, партиялар менен сүйлөшүп жатканын маалымдаган.
Ал ошондой эле, акыркы убакта президенттин колдоосу болбой калганын билдирип, кызматтан кетүүсүнө эң биринчи себеп ушул болгонун айткан.
