Бишкек, 19-фев — Sputnik. Өз алдынча жарыяланган Донецк элдик республикасынын (ДЭР) Башкы прокуратурасы Донбасста согуш баштагандык факты боюнча Украинанын жетекчилигине каршы кылмыш ишин козгоду деп билдирет РИА Новости Донецктин жаңылыктар агенттигине таянуу менен.
"Украинанын мамлекеттик кызмат адамдары тарабынан кандуу согушту пландоо, даярдоо, баштоо жана жүргүзүү факты боюнча, ДЭРдин КЖКнын 423-беренесинин 2-бөлүмүндө каралган кылмыш белгилери боюнча кылмыш иши козголсун", — деп айтылат агенттик келтирген иш козгоо жөнүндө токтомдо.
Аталган кылмышты жасагандык үчүн шектелүүчүлөр: Украинанын президенти Петр Порошенко, премьер-министри Арсений Яценюк жана УКККнын катчысы Александр Турчинов деп кошумчалайт агенттик, документке таянуу менен.
"Донбасстын элинин ДЭР жана ЛЭР түзүлгөндүгүн жарыялоо жөнүндө эркине макул болбогон Украинанын жетекчилиги мыйзамсыз кылмыштуу түзүмдөр менен зомбулуктуу жазалоочулар батальондору Донбасстын аймагына басып киришин уюштурган", — деп айтылат агенттиктин документке таянып берген билдирүүсүндө.
Украина бийлиги 2014-жылдын апрелинде аталган жылдын февралында өткөн мамлекеттик төңкөрүшкө нааразы болгондорго каршы Донбасста күч операциясын баштаган. БУУнун акыркы маалыматтарына караганда, 5,3 миңден ашык карапайым тургундар бул чыр-чатактан курманы болду.
Минскте 12-февраль күнү Украина боюнча "Нормандиялык төртиликтин" Россия, Франция, Украина жана Германия өлкөлөрүнүн башчыларынын сүйлөшүүлөрү аяктаган Украинада кырдаалды жөнгө салуу боюнча байланыштыруучу топ Минск макулдашууларын аткаруу боюнча чаралар жөнүндө документ кабыл алган. Анда Донбасста ок атууларды 15-февралдан тартып токтотуу, оор куралдарды бири-биринен алыстатуу жана коопсуз тилкени түзүү каралган.
