БИШКЕК, 13-фев — Sputnik. Бишкек мэриясынын билим берүү департаменти №44 мектептин абалын билишет жана быйыл оңдоо иштерин баштоону пландап жатат. Оңдоо иштери менен мэриянын алдындагы муниципалдык курулук башкармалыгы алып барыш керек.
"Мектепти толук оңдоп чыгуу үчүн 40 миллион сом керек экени эсептелип чыккан. Бул каражатты бөлүү Бишкек шаардык кеңеши тарабынан жактырылышы керек. Бул жылы каралган титулдук тизмеге №44 мектепти оңдоо боюнча арыз бердик", — деп кошумчалашты шаардык билим берүү департаментинен.
Титулдук тизме жана шаардын 2015-жылкы бюджети Бишкек шаардык кеңеши тарабынан кабыл алынат.
Аталган мектеп үч бөлүктөн турат. Алардын бирөө 1940-жылы курулуп, учурда авариялык абалда турат. Бул бөлүк капиталдык оңдоо үчүн жабылган. Биринчи жана экинчи бөлүгү 1956-жылы салынган. Учурда 922 окуучу экинчи бөлүктө окуп жатышат.
