БИШКЕК, 3-фев — Sputnik. Россиянын Федералдык миграция кызматынын Кыргызстандагы "Паспорттук-виза сервис" ишканасынын директору Бакыт Эркинбеков КРдин жарандары үчүн каралган жаңы кызматтар туурасында Sputnik маалымат сайтынын кабарчысына маалымдады. Биздин мекендештер эми Россиянын аймагына кирүүгө ага тыюу салынган, салынбагандыгын маалыматтар топтомунан он-лайн режимде текшерип ала алат.
"Биздин базадан мигранттардын "кара тизмеде" бар же жогун билүү мүмкүнчүлүгү бар. Ал үчүн арыз жазса, биздин он-лайн режимдеги кызматыбыз алардын колдоруна расмий жоопту карматат. Андан сырткары жарандардын акча өндүрүү максатын алдамчыларга туш келип калышынан сактайт", — деп түшүндүрүштү Федералдык миграция кызматынан.
Аталган ишкананын жетекчисинин айтымында, алардын кызматынан пайдаланууну каалагандар Бишкек шаарындагы, Абдрахманов көч. 204, ал эми Ош аймагындагылар облустук мамлекеттик администрациянын имаратында, тактап айтканда, Ош шаарындагы Ленин көч. 221 дарегине кайрылып, тиешелүү суроолорун берип, тактап алуу мүмкүнчүлүгү бар.
"Бир топ жарандар өзүнүн "кара тизмеде" бар жоктугун өз алдынча же автобекеттердеги, аба майдандардагы, ал тургай райондун борборундагы шектүү жерлерден текшертип жүрүшөт. Анын кесепетинен, Россияга жакка учуп барып алып, чек арадан кире албай кайра кайтканга мажбур болуп жатышат", — деп кошумчалады Эркинбеков.
РФтин Федералдык миграция кызматынын Кыргызстандагы "Паспорттук-виза сервис" ишканасынын директору алардын маалыматтар топтому жаңы жана дайым жаңыланып тургандыктан, расмий текшерүүдөн өтүп коюуну сунуштайт.
