БИШКЕК, 29-дек — Sputnik. Аи-95 жана Аи-98 үлгүсүндөгү бензин эки сомго арзандаганын Кыргызстандын нефтетрейдерлер ассоциациясы билдирди.
Ошентип, 27-декабрга алынган маалымат боюнча Аи-80 үлгүсүндөгү бензин 1 сомго, Аи-92 үлгүсүндөгү бензин элүү тыйынга арзандаса, Аи-95 жана Аи-98 үлгүсүндөгү бензин эки сомго арзандаган. Дизелдик май болсо, 0,5 сомго арзандаган.
Күйүүчү жана майлоочу майдын арзандашын нефтетрейдерлер ассоциациясы нефтепродукциялардын дүң баасынын россиянын рыногунда арзан болуп жатышы жана сезондук суроо-талаптын төмөндөшү менен түшүндүрүүдө.
"Нефтини кайта иштетүүчү бир нече заводдогу оңдоо иштери аяктап, алардын рынокко болгон сунушу да көп болууда. Ошондой эле, күйүүчү майга болгон сезондук суроо-талаптын төмөндөшү арзандоого себеп болууда", — деп ассоциация билдирүүдө.
Бишкек шаары боюнча Аи-80 үлгүсүндөгү бензиндин орточо баасы 38 сом, Аи-92 – 46,4 сом, Аи-95 – 49 сом, Аи-98 – 51 сом жана дизелдик май – 39,5 сом турат.
Ош шаарында Аи-80 үлгүсүндөгү майдын орточо баасы 40 сом, Аи-92 – 48,9 сом, Аи-95 – 52 сом жана дизелдик май – 42 сом болууда.
