БИШКЕК, 29-дек — Sputnik. Жогорку Кеӊештин "Ар-Намыс" фракциясынын лидери Феликс Кулов ишембиде Корея Республикасынын Улуттук ассамблеясынын (парламентинин) Социалдык маселелер боюнча комитетинин төрагасы Ким Чуун Жин баштаган өкүлчүлүк тобу менен жолугушту. Бул туурасында ЖКнын маалымат кызматы билдирди.
Кулов Түштүк Кореянын Кыргызстандагы элчилиги акыркы мезгилде активдүү иш алпара баштагандыктан, кыргыз-корей кызматташтык мамилелеринде кыйла жандануу байкалгандыгын белгиледи.
"Корей медицинасы өзүнүн сапаты, тактыгы, чапчаӊдыгы менен айырмаланат. Аны башка өнүккөн өлкөлөр менен салышытырып көрүп, ынандым. Өткөндө Кореянын өкмөт жетекчилигине Кыргызстанда эл аралык стандарттагы госпиталь куруу долбоорун сунуштаган элем. Ошону менен бирге, оорукананы алдыӊкы медициналык технология менен жабдып, белгилүү бир мөөнөткө чейин менеджмент ишин да колго алуусун өтүнгөм. Мындай долбоор ийгиликтүү болоруна ишеним бар", — деди Кулов.
Ким Чуун Жин өз маектешинин Кыргызстанда госпиталь куруу демилгесинен мурдатан кабардар болгонун, ал долбоорду ишке ашырууга толук мүмкүнчүлүктөр бар экенин айтты.
Жолугушуу жүрүшүндө эки тараптуу кызматташтыктын келечеги, эки өлкө парламенттеринин ортосундагы алакаларды арттыруу боюнча сүйлөшүүлөр болду.
