БИШКЕК, 20-июн. — Sputnik. Вашингтон университетинин окумуштуулары жашоонун узак болушун эмнелер шарттай турганын аныкташты. Адистердин эмгеги International Journal of Environmental Research and Public Health журналына жарыяланганын РИА Новости жазды.
Окумуштуулар узак өмүр сүрүү бир гана генден эмес, адамдын жашаган чөйрөсүнө да байланыштуу экендигин айтышты.
Изилдөөнүн алкагында 2011-2015-жылдары 75 жашында жана андан көп өмүр сүрүп каза болгон 145 миң адамдын жашаган жери, билими жана социалдык абалы жөнүндө маалыматтар талдоого алынган.
Натыйжада 100 жашка чейинки курактагы адамдардын көпчүлүгү абасы таза жерде жашап, күн сайын сейилдеп, кыймылда болуп турушкан.
Окумуштуулар узак жашоого мындан сырткары адамдын социалдык абалынын жакшы болушу, айлана-чөйрөнүн жашылданып турушу жана медицинанын өлкөдө өнүгүшү таасир бере турганын кошумчалашкан.
