БИШКЕК, 17-фев. — Sputnik. Москвада пирожное жеп жарышуу боюнча сынакка катышкан 23 жаштагы кыз ден соолугу начарлап каза тапты. Бул туурасында РИА Новости жазды.
Окуя 15-февралда Killfish барында болгон. Сынакка катышкандар таттуу токочту аз убакытта жеп бүтүшү керек болчу. Анда күчүн сынаган кыз конкурстан кийин курбусу менен сүйлөшүп отурган. Бир убакта өзүн жаман сезип, эс-учун жоготкон.
Жанында тургандар аны жасалма дем алдырып, Тез жардам кызматын чакырышкан. Медиктер кыз каза тапканын аныктап, бирок өлүмүнө эмне себеп болгону азыркыга чейин так айтыла элек.
