National Geographic, BBC жана Fubiz баракчаларына эмгектери жарыяланган таиланддык видеомейкер Пит Рожвунгсурия Кыргызстан тууралуу ролик тартты.
Ал өзүнүн жаңы эмгегин Sputnik Кыргызстан агенттиги менен бөлүштү. Ролик "Кыргызстанда жашагыла" деп аталат.
"Кыргызстан көпчүлүк биле элек мамлекеттердин бири. Ал Орто Азиядагы туристтер үчүн эң жеткиликтүү, ачык, кызыктуу өлкө. Анда көк тиреген тоолор, адамдын колу тие элек көлдөр бар. Саякатка чыгып укмуштуудай жаратылышына көз чаптырып, асмандагы миллиондогон жылдыздарга суктанууга болот", — деп видеонун алдына жазылган.
"Мен 50гө жакын мамлекетти кыдырып чыктым. Алардын ичинен Кыргызстан өзгөчө эсимде калды. Сапар учурунда Соң-Көл, Ысык-Көл, Ала-Көл, Арстанбаб жана Ошто болдум. Ошондой эле Каракол менен Кажы-Сайдан өтүп кете алган жокмун. Бардык жер өзүнүн кооздугу менен тартып турду. Видеомдо ошол керемет көрүнүштөрдү берүүгө аракет жасадым", — деди саякатчы.
Дизайнер жана кинематографист Пит Рожвунгсурия Таиландда туулган. Ал дүйнө кезип туристтик багыттагы видео роликтерди тартып келет.
