БИШКЕК, 4-ноя. — Sputnik. UFC уюмунун жеңил салмактагы чемпиону, россиялык спортчу Хабиб Нурмагомедов кийинки беттешинде 50 миллион доллар табышы мүмкүн экендигин MMA Fighting басылмасы лиганын президенти Дана Уайтка шилтеме берип жазган.
Уайттын айтымында, Нурмагомедовдун командасынын талабы иш жүзүнө ашышы ыктымал. Бирок Хабибдин атаандашы ким болору жана беттеш кайда өтөрү айтылган эмес.
Нурмагомедов октябрдын ортосунда боксчу Мейвезерди беттешке чакырган, ал эми америкалык мушкер телеканалдар турнирди чагылдырууга каражат топтой бериши керектигин жар салган. Россиялык спортчунун атасы жана машыктыруучусу Абдулманап Нурмагомедов уулу менен Мейвезердин кармашы Россияда өтүшү керектигин билдирген.
Мейвезер менен Нурмагомедов экөө тең бир да ирет утулган эмес.
Былтыр Мейвезер менен ирландиялык ММА мушкери Конор Макгрегор бокс эрежеси менен беттешип, жыйынтыгында америкалык спортчу техникалык нокаут менен утуп алган.
Ошондой эле Конор Хабибге да быйыл 6-октябрда өткөн UFC 229 турниринин алкагында утулуп калган.
