БИШКЕК, 22-авг. — Sputnik. Азия оюндарында кыргызстандык Үзүр Жусупбеков грек-рим күрөшүнөн коло медаль утту.
Ал 97 килограмм салмак категориясында күч сынашты. Үчүнчү орун үчүн өзбекстандык Жахонгир Турдиев менен кармашып 2:0 эсеби менен жеңип алды. Жарым финалда кытайлык Сяо Диге таза жеңиш менен утулуп калган.
Ушуну менен Кыргызстандын байге куржунундагы медалдардын саны тогузга жетти. Буга чейин кыргызстандык балбандар грек-рим, эркин жана кыз-келиндер арасындагы күрөштөн төрт күмүш, үч коло уткан. Ал эми оор атлетикадан Иззат Артыков коло байге тагынды.
Азия оюндары 18-августтан 2-сентябрга чейин Индонезиянын Жакарта жана Палембанг шаарларында өтмөкчү. Мелдештер спорттун 40 түрү боюнча өтсө, анын 32си олимпиадалык, сегизи спорттун олимпиадалык эмес түрлөрү. Жалпысынан 481 медаль комплектиси ойнотулат.
Ал эми кыргызстандык 150дөй спортчу спорттун 28 түрү боюнча күч сынашат (23 олимпиадалык, 5 олимпиадалык эмес оюндар).
