БИШКЕК, 8-май — Sputnik. Коронавирус "РСК банкы" менен №1 тергөө абагынын кызматкерлеринен да табылган. Бул тууралуу саламаттык сактоо министринин орун басары Нурболот Үсөнбаев брифинг учурунда маалымдады.
Анын айтымында, СИЗО-1деги бир кызматкерден COVID-19 аныкталган. Азыркы тапта эпидемиологиялык иликтөөлөр жүрүп жатат.
"Мындан сырткары, "РСК банкынын" эки кызматкери да коронавирус жуктуруп алган. Алардын бири Бишкек шаарында жашайт, азыр дарыланып айыгып чыкты. Экинчиси Чаткал районундагы банктын филиалынын кызматкери. Ал азыр ооруканада дарыланууда", — деди Үсөнбаев.
Акыркы маалыматтар боюнча, Кыргызстанда коронавирус 906 адамдан аныкталды. Анын теңинен көбү, тагыраагы, 650сү айыгып чыкты. Вирус жуктуруп алган 12 адам каза болгон.
Ушу тапта Кыргызстанда абал кандай болуп жатканын Sputnik агенттиги жүргүзүп жаткан тексттик баяндамадан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
