БИШКЕК, 7-май — Sputnik. Бишкектин 60 көчөсүн калыбына келтирүүгө конкурс жарыялоого даярдык көрүлө баштаганын брифингде вице-мэр Уланбек Азыгалиев билдирди.
Анын айтымында, "Бишкектин жол-көчө тармактарын өнүктүрүү" долбоорунун биринчи фазасы аяктап калды. Пландалган 95 чакырым жолдун 94 чакырымы реконструкцияланды. Пландалган иштер ушул жайда аягына чыгат.
"Долбоордун экинчи фазасын ишке ашыруу үчүн сынак жарыялоого даярдык көрүлө баштады. Анын алкагында 70 чакырымга созулган 60 көчөнү калыбына келтирүү жана реконструкциялоо иштери пландалууда. Алардын ичинен 33 чакырымды түзгөн 26 көчө жаңы конуштарда жайгашкан", — деди Азыгалиев.
Эске салсак, аталган долбоор Кытайдын гранттык эсебинен ишке ашырылууда.
