БИШКЕК, 24-фев. — Sputnik. Эмгек жана социалдык өнүктүрүү министрлигинин Эмгек башкармалыгынын адиси Мунара Кожогулова алты күндүк иш жуманын графиги боюнча иштегендердин эс алуу күндөрү кандай бөлүштүрүлөрүн түшүндүрүп берди. Бул график боюнча иштегендерге оорукана, бейтапканалар кирет.
Белгилей кетсек, бүгүн Кыргызстан боюнча оорукана менен бейтапканалар иштебей турганы маалым болду.
Ооруканалардын иштебей жаткан себебин Саламаттык сактоо министрлигинин алдындагы Бишкек шаардык башкармалыгынын жетекчиси Бактыгүл Исмаилова графикке байланыштырды. Анын айтымында, ооруканалар менен бейтапканалар алты күндүк иш жуманын графиги боюнча иштейт.
"Жаңы жылдагы эс алуу күндөрү боюнча өкмөттүн токтому беш күндүк иш графиги менен иштеген мамлекеттик кызматкерлерге тиешелүү болчу. Ал эми дарыгерлер 2-январь күнү эле жумушка чыгышкан. Майрам, эс алуу күндөрүн жылдыруу бизге тиешелүү эмес", — деди Исмаилова.
Алдыдагы эки майрам — 8-март менен Нооруз дагы дем алыш күндөрүнө туш келет. Бул күндөрү дарыгерлер кандай иштей турганын Мунара Кожогулова түшүндүрдү.
"Ооруканалар менен бейтапканалар 9-март жана 21-март күндөрү эс алышат. Анткени алар алты күндүк иш жуманын графиги боюнча иштейт. Эмгек кодексинде жазылгандай, эгер майрам жекшемби күнгө туура келип калса, алты күндүк иш жуманын графиги боюнча иштегендер дүйшөмбү күнү эс алышат. Эгер майрам ишемби күнгө дал келсе, ал күн кадимкидей эс алуу күнү болот дагы, апта башында алты күндүк график менен иштегендер жумушка чыгышат. Ошондо 8-март жекшембиге дал келгендиктен, ооруканалар менен бейтапканалар 9-мартта эс алышат. Ал эми 21-март – Нооруз майрамы ишембиге туш келгендиктен, дарыгерлер ушул күнү эс алат дагы, 23-март, дүйшөмбүдө, кадимкидей иштеши керек", — деди Кожогулова.
Эске салсак, 2020-жылы кыргызстандыктар жаңы жылда 7 күн катары менен, 1-январдан 7-январга чейин эс алышкан.
