БИШКЕК, 1-сен. — Sputnik. Орус-кыргыз өнүктүрүү фондусунун башчысы Эркин Асрандиев көлдөн сүзүп өтүп бараткан учурда капысынан аба ырайы бузулуп кеткенин Sputnik Кыргызстан агенттигинин кабарчысына билдирди.
Анын айтымында, эртең менен саат 7:20лар чамасында, сүзө баштаган учурда күн ачык болчу.
"Саат 17:00дөр чамасында катуу шамал болуп, чоң толкундар башталды. Мени коштоп бараткан кайык артта калып жатканын байкадым. Бир аздан кийин бири-бирибизди такыр эле таппай калдык. Мен коштоп келе жаткандарга аябай тынчсыздандым", — деди ал.
Асрандиев түнкү саат 00:20лар чамасында Бар-Булак айылындагы жээкке сүзүп чыгып маякка барганын, саат 2:00дөр чамасында куткаруучуларга жолукканын айтты.
Ал журналисттин "Толкун маалында өлүп калам деп корккон жоксузбу?" деген суроосуна көбүн эсе аны коштоп жүргөндөргө тынчсызданганын белгиледи.
"Мен көбүн эсе коштоп жүргөндөргө тынчсыздандым. Аларда куткаруучу жилет болгону менен аны кийишкен эмес. Эгер кайык оодарылып кетсе аны кийгенге жетишпей калабы деп корктум. Өзүмө анчейин деле тынчсызданган жокмун, себеби сүзүп өтөөрүмдү билгем", — деди ал.
Орус-кыргыз өнүктүрүү фондусунун башчысы жалпысынан сууда 19 сааттай болгонун белгилеп, негизинен 14-15 сааттын ичинде 30 чакырымды сүзүп өтүүнү пландаганына токтолду. Бирок аба ырайынан улам пландары да өзгөрүп кеткен.
Белгилей кетсек, Асрандиевдин тууганы 31-августта саат 18:00дөр чамасында көлдө эки метрге жеткен толкун болгондон кийин аны таппай калышканын айткан. Анын жанында коштоп жүргөн кайык бар болчу. Өзү буёкту байланып сүзүп бараткан.
Катуу толкун болгондо кайыктагы киши менен да байланыш үзүлүп калган.
Эркин Асрандиев Чырпыкты айылынан Кара-Талааны көздөй сүзүп баратып Тору-Айгыр айылына келгенде жоголуп кеткен. Башкача айтканда, ал Ысык-Көлдүн түндүгүнөн түштүк тарабына сүзүп өтүүгө белсенген. Аны издөөгө бардык күчтөр тартылып, өкмөт башчы окуя жеке көзөмөлүндө экенин билдирген.
