БИШКЕК, 18-май — Sputnik. Президент Сооронбай Жээнбеков 608 айылды таза суу менен камсыз кылуу үчүн 34 миллиард сом керек экендигин билдирди.
Мамлекет башчынын маалымат кызматынан кабарлашкандай, Жээнбеков Балыкчы шаарынын тургундары менен жолугушууда республиканын 653 айылында таза суу жок экендигин айткан.
"Таза суу тартыш болуп турганда кайдагы ден соолук, экономика, туризм тууралуу кеп кылабыз? Таза суу бар жерде оору-сыркоо болбойт, туристтер баш багат, экономика да өсөт. Жаңы иштер ачылып, инвесторлор келет. Ошондуктан таза суу маселесине бөтөнчө көңүл бурабыз", — деген Жээнбеков.
Жээнбековдун айтымында, азыр 27 миллиард сомдун каржы булагы табылды.
"Калган акчаны табуу үчүн эсеп институттары менен иштешип, эл аралык фондулардан, донорлордон грант караштырып жатабыз", — деди мамлекет башчы.
Ажо мөөнөтү аяктаганга чейин өлкөнүн бардык аймагын таза суу менен камсыздайм деп убада берди.
