05:17 23 Баш оона 2019
Түз эфир
  • USD69.7961
  • EUR77.4597
  • RUB1.0636
Кыргызстандын жаранын паспорту. Архив

Баланы чет өлкөгө чыгаруу үчүн паспортту кантип алуу керек? 9 суроого жооп

© Sputnik / Жоомарт Ураимов
Коом
Кыскача шилтеме алуу
Таалайгүл Усенбаева
3054 0 0

Эми балаңызды кайсы өлкөгө алып барууга камынбаңыз, ага паспорт алышыңыз керек. Ал үчүн кандай документтер керек, кимге кайрылып, документти канча сомго бүтүрсө болорун Sputnik Кыргызстан агенттиги даярдаган материалдан билсеңиз болот.

Балаңызды буга чейин Россия, Өзбекстан жана Казакстан мамлекеттерине тиркеме менен гана алып чыгып жүрсөңүз, эми тартип өзгөрөт. Тагыраагы, ушул жылдын 1-июлунан тарта Кыргызстандан жогоруда белгиленген өлкөлөргө жашы жете элек балдарды алып чыгуу үчүн керектелген тиркеме берүү токтойт. Бул тууралуу Мамлекеттик каттоо кызматы кабарлаган.

Ушул жана башка өлкөлөргө барууда эми өзүңүзгө эле эмес, балага да сыртка чыга турган паспорт (жалпы жарандык) алышыңыз керек болот. Аны алууда ата-эне кандай документтерди топтоп, кайда кайрылса болот? Балага паспорт канча убакытта жасалып бүтөт? Ушул жана башка суроолорго Аламүдүн райондук паспорттоштуруу жана калкты каттоо бөлүмүнүн башчысы Ринат Алиев жооп берди.

Сыртка чыгуучу паспорт алууда баланын жаш курагы эске алынабы?

Мыйзам боюнча чет мамлекетке чыгып жаткан КР жаранынын колунда сөзсүз жалпы жарандык паспорту болушу керек. Бул мыйзам жаңы төрөлгөн ымыркайга да тиешелүү. Буга чейин жашы 16га чыга элек балдарга Казакстан, Өзбекстан жана Россияга алып чыгуу үчүн туулгандыгы тууралуу күбөлүктүн ичине кошумча тиркеме берилчү. Бирок мындай тиркемелерди айрымдары үйүнөн деле колго жасап алып жаткандыктан, балага да паспорт алуу милдеттендирилди. Мындай тартип менен бала сатуунун алдын алалы деп жатабыз. Үч өлкөдөн башкасына буга чейин деле балага паспорт алышчу.

Кандай документтер керек?

Баланын ата-энесинин экөөнүн тең паспорту керек. Эгер атасы же апасынын көзү өтүп кеткен болсо, өлгөндүгү тууралуу документ зарыл. Мындан тышкары, баланын туулгандыгы тууралуу күбөлүгү, сыртка алып чыгуу үчүн атасынын да, энесинин да уруксаты керек. Ал уруксат кагазды нотариустан жасатышат. Ошондой эле паспорт бөлүмдөрүнөн тартылган баланын сүрөтү зарыл.

Эгер баккан бала болсо мыйзамдуу түрдө багып алууга уруксат берген соттун чечими керек.

Жаңы төрөлгөн ымыркай болсо да сүрөткө тарттырыш керекпи?

Сөзсүз.

Баланын сыртка чыгууга алган паспорту канча мөөнөткө чейин жарактуу болот?

Ымыркайлардын өң-келбети өзгөрүп тургандыгын эске алып, 16 жашка чейинки балдарга үч жылга берилет. Тактап айтканда, баланын жаңы төрөлгөнүнөн тарта 16 жашка чейин сыртка чыга турган паспортун үч жылда бир алмаштырып туруу зарыл.

Чоңдордун сыртка чыгуу паспорту менен балдардыкы эмнеси менен айырмаланат?

Экөө окшош эле болот. Болгону чоңдордуку узак убакытка берилсе, балдардыкын үч жылда бир алмаштырып туруу кажет. Эгер бала 15 жашта болсо, ал документти 18 жашка чейин колдонуп, андан кийин алмаштырса болот.

Документ акысыз даярдалабы же төлөмдөр барбы?

Мамлекеттик төлөмдөр төлөнөт. Анын өлчөмү — 530 сом. Бул бир айлык мөөнөттүн эсеби. Мындан тышкары, 8, 4, 2 күндө, ошондой эле үч саатта да даярдалат. 8 күндүгүнө 2170 сом алса, төрт күндүгү 2450 сом турат. Эки күндүгү 2780 сом. Эгер үч сааттын ичинде алып кетем десеңиз, 6390 сом даярдай келиңиз.

Чет өлкөгө бала менен аз убакытка эс алууга бара турган болсо да паспорт алуу зарылбы?

Ар бир мамлекет өз аймагына киргизээрде сөзсүз бул документти сурайт. Андыктан бардык чет өлкөгө, ал тургай коңшу мамлекетке кирүү үчүн дагы сөзсүз сыртка чыга турган паспорт болушу шарт.

Балага сыртка чыгууга паспорт алуу үчүн кайсы мекемелерге кайрылуу керек?

Өлкөнүн бардык райондорундагы паспорт бөлүмдөрүнө жана калкты тейлөө борборлоруна арыз таштап паспорт ала алышат.

Кокус ата-энеси сыртта болуп Кыргызстандан баласын башка адам алып чыга турган болсо, кошумча документ чогултуш керекпи?

Эгер баланын ата-энеси сыртта болсо, ошол жактын нотариустарынан алган макулдугу тууралуу уруксат кагазын жөнөтүп жибериши керек. Баланы чет өлкөгө алып чыгып кете турган адамга да ишеним кат жазып берүүсү зарыл.

Тема боюнча

Эми баланы өлкөдөн алып чыгуу үчүн сөзсүз паспорт алуу керек. Жаңы тартип
2020-жылы Кыргызстанда калкты каттоо өтөт
Белгилер:
чет өлкө, паспорт, бала

ЭҢ МААНИЛҮҮ