БИШКЕК, 4-фев. — Sputnik. Мамлекеттик каттоо кызматы тендердин жыйынтыгы менен жаңы муундагы жалпы жарандык паспорт үчүн бланк алып келе турчу компанияны аныктап, жеңүүчү деп Литванын "Гарсу пасаулис" ЖАКын тапты. Бул тууралуу мекеменин маалымат кызматы билдирди.
Бланктарды сатып алуу жана конкурстук документация ведомстволор аралык комиссия тарабынан жактырылган.
"Биометрикалык маалыматтарды колдонуу менен жаңы муундагы улуттук паспортторду чыгаруу КР өкмөтүнүн трансчекаралык кылмыштуулуктун алдын алууда, коопсуздукту камсыздоодо жана документтерди жасалмалоого каршы күрөшүүдөгү негизги милдеттеринин бири", — деп айтылат маалыматта.
Жаңы паспорттун 40 коргоо элементи бар. Андан сырткары, чет жакка көп чыккан кишилер үчүн виза коюла турчу барактарды 50гө чейин жеткирүү каралган. Калган учурларда мурдагыдай эле 34 барактан турат.
Жаңы үлгүдөгү жалпы жарандык паспорттор кишинин чек арадан тез өтүүсүн камсыз кылып, анын ким экенин тастыктоодо көп убакытты калап кылбайт.
