БИШКЕК, 16-дек. — Sputnik. Президент Сооронбай Жээнбеков Нурсултан Назарбаевди жана Казакстан элин өлкөнүн Көз карандысыздык күнү менен куттуктап, кыргыз-казак мамилелеринин чыңалышына ишеним артарын айтты. Бул туурасында мамлекет башчынын маалымат кызматы кабарлады.
"Кыргызстан элинин жана жеке өзүмдүн атымдан сизди жана бардык казакстандыктарды Казакстандын көз карандысыздык күнү менен чын жүрөгүмдөн куттуктайм! Союздаштыктын жана стратегиялык өнөктөштүк маанайындагы кыргыз-казак мамилелери өлкөлөрүбүздүн элдеринин кызыкчылыгында мындан ары дагы чыңдалып жана өнүгө берет деген ишенимимди билдирем", — деп айтылган куттуктоодо.
"Сизге чың ден соолук, бакубатчылык жана сиздин мамлекеттик ишмердигиңизге ийгиликтерди, ал эми бир тууган Казакстан элине – тынчтык жана гүлдөп өнүгүү каалайм", — деп белгиленген Жээнбековдун куттуктоосунда.
Эскерте кетсек, бүгүн Казакстан өзүнүн эгемендүүлүгүнүн 26 жылдыгын белгилеп жатат.
