ОШ, 29-ноя. — Sputnik. Ош облустук Кайгуул милиция бөлүмүнүн кызматкерлерине алгачкы медициналык жардам көрсөтүү боюнча окуу семинар өткөрүлдү. Бул тууралуу Кайгуул милициясынын маалымат катчысы Айбек Бечелов Sputnik Кыргызстан агенттигине билдирди.
Анын айтымында, аталган иш-чара ИИМдин Кайгуул милиция башкы башкармалыгынын эл аралык "Кызыл жарым ай" коому менен түзгөн келишимдин негизинде өткөрүлдү.
"Милиция кызматкерлери окуу семинардан кырсыкка кабылгандардын өмүрүн кантип сактап калуу керектигин үйрөнүштү. Милиция жол кырсыгы катталган жерге сөзсүз барат. Милиция кызматкерлери дарыгер адистерден жол кырсыгына кабылып, башы жарылган, буту сынган жарандарга кандай жардам берүү керектигин үйрөнүштү. Ошондой эле канды кантип токтотуу керектигин, жасалма дем алдыруу жана башка ушул сыяктуу алгачкы медициналык жардам көрсөтүү ыкмаларын өздөштүрүштү", — деди Бечелов.
Кайгуул милициясынын окуудан өткөрүлгөн 40 кызматкерине сертификат тапшырылды.
Эске сала кетсек, Ош облусунда акыркы он айда 635 жол кырсыгы катталып, 116 адам каза болгон. Ал эми 1114 адам түрдүү жаракаттарды алып, ооруканага кайрылган.
