БИШКЕК, 24-ноя. — Sputnik. Ички иштер министрлигинин маалымат кызматынан бүгүн президенттин инаугурациясынан соң өкмөттүк жол менен келе жаткан өлкө башчысынын кортежин ээрчиген ак түстөгү жолтандабастын чоо-жайын түшүндүрдү.
Эске салсак, бүгүн Чыңгыз Айтматов проспектисинде президенттик кортеждин артынан ак Toyota Land Cruiser унаасы ээрчип келгени түз алып көрсөтүү маалында көрүнгөн. Кайгуул милиция кызматкерлеринин жанынан өткөндөн кийин белгисиз унаанын алдын бир киши тосуп калган.
“Бир катар ЖМКлар кортежди белгисиз бир унаа ээрчип келди деген мааниде билдирүүлөрдү таратышты. Ак түстөгү Toyota Land Cruiser президенттик кортежге тиешелүү унаа. Болгону ал бир нече мүнөт кийинчерээк чыгышы керек болчу. Өлкө президентинин жанына белгисиз, эч кимдин кабары жок унаанын келип калышы мүмкүн эмес”, — деп айтылат түшүндүрмөдө.
Ошондой эле кортеж штаттык режимде өтүп, анын коопсуздугун укук коргоо органдары баштан-аяк көзөмөлдөп турганы кошумчаланды.
