Жолдо төрөт кабыл алган Кайрат Примбердиев тууралуу 7 факты

Примбердиев 1985-жылы 24-ноябрда Ош облусунун Кара-Кулжа районунун Ылай-Талаа айылында төрөлүп, Талас районунун Көк-Ой айылында өскөн.

Sputnik Кыргызстан маалымат агенттиги ырчы тууралуу 7 факты сунуштайт.

1. Кайрат Примбердиев деген ысым кыргыз эстрадасында 2006-жылы пайда боло баштаган. Сахнага алгач ырчы Султан Садыралиев менен биргеликте "Арноо" аттуу ыр менен чыккан. Андан кийин "Сагынганда", "Сүйүү аптабы" аттуу ырлары менен таанымал болгон. Ошол кезде ырчынын продюсери Динара Эсенгулова болчу.

2. 2011-2013 жылдары Казакстандын Актау шаарында жашап, кафе-ресторандарда иштеген. Ырчынын "күн сайын үзгүлтүксүз ырдап тажрыйба топтодум, бактым Элвираны таптым" деп айтканы бар. 

3. Отуздан кийин өрт алган ырчы. Кайрат Примбердиев 2015-жылдан тарта эл аралык конкурстарга катыша баштаган. Россиялык "Главная сцена" телешоусунун супер финалына жана "Голос" теледолбоорунда финалына чыккан. Быйыл мурдагы президент Алмазбек Атамбаевдин токтому менен 2017-жылы 22-ноябрда КРдин Эмгек сиңирген артисти аталды.

4. Төрөт кабыл алган… Ырчы 2009-жылы Таласка туугандарына учурашканы барат. Жездеси менен бир айылдан экинчи айылга жол тартып баратканда ай-күнүнө жетип толготуп жаткан аял жол тосуп калат. Эки айылдын ортосундагы талаага жеткенде баланын башы чыгып калганын айткан аялдын төрөтүн кабыл алышат. Биринчи жардамын көрсөтүүгө катышкан ырчы наристени энеси менен ооруканага жеткирген.

5. Астма оорусу бар. Ырчынын сахнага чыгарда спрей, дарыларымды кошо ала жүрөм дегени бар. Алгач тамагы аллергия болуп, ал бронхитке, кийин астмага айланып кеткен.

6. Бут кийим таппай кыйналганда… Кайраттын бою жапалдаш, башкача айтканда 160 сантиметр болгону менен бутунун өлчөмү 39 сантиметр. Ырчынын "бут кийим тандаганда кыйналам" деп айтканы бар.

7. Жеке жашоосу. Өмүрлүк жары Элвира Примбердиева да чыгармачыл адам, тар чөйрөдө ырдайт. Жубайлар эки уулдун ата-энеси.