БИШКЕК, 20-ноя. — Sputnik. Өлкө башчы Алмазбек Атамбаев "Мамлекеттик сыйлыктар менен сыйлоо жөнүндөгү" жарлыкка кол койду. Бул тууралуу президенттин сайтына жарыяланды.
Буга чейин, 14-ноябрда ушундай эле жарлыкка президент кол койгон болчу.
II даражадагы "Манас" ордени менен гандбол боюнча олимпиада чемпиону, машыктыруучу Талант Дүйшөбаев менен президенттин коомдук башталыштагы кеңешчиси Фарид Ниязов сыйланды.
Ал эми III даражадагы "Манас" орденине президенттин коомдук башталыштагы дагы бир кеңешчиси Икрамжан Илмиянов татыган.
"Курманжан датка" ордени менен Шайлоо жана референдум өткөрүү боюнча борбордук комиссиянын төрайымы Нуржан Шайлдабекова сыйланды.
"Достук" орденине Жогорку Кеңештин депутаты Анвар Артыков, премьер-министрдин кеңешчиси Токон Мамытов, Жогорку Кеңештин депутаты Алтынбек Сулайманов татыды.
"Даңк" ордени менен сыйлангандар дагы болду. Алар: Жогорку Кеңештин депутаты Иса Өмүркулов, эстрада ырчысы Рыскелди Осмонкулов.
Ал эми "Даңк" медалы менен көз карандысыз эксперт Жумакадыр Акенеев, саясат таануучу Бакыт Бакетаев, Мамлекеттик каттоо кызматынын төрагасы Дастан Догоев, Куралдуу Күчтөрдүн Генералдык штабынын башчысынын кеңешчиси Токтогул Какчекеев сыйланды.
Ал эми эстрада ырчылары Кайрат Примбердиев менен Гүлзинат Суранчиева "Кыргызстандын эмгек сиңирген" артисти наамын алышты.
Ошондой эле ардак наамдар дарыгерлерге, мугалимдерге, маданият менен илимдин адамдарына тапшырылды. Толук тизме менен шилтемеден тааныша аласыздар.
