БИШКЕК, 6-авг. — Sputnik. Эл аралык армия оюндарынын алкагында өтүп жаткан Танк биатлонунда кыргызстандык танкачылар марага экинчи болуп келишкенин уюштуруучулар кабарлашты.
Москвадагы Алабино полигонунда танк биатлонунун акыркы таймаштары өттү.
“Мында Кыргызстан, Сербия жана Россиянын экипажы күч сынашты. Биринчи болуп россиялыктар келсе, кыргызстандыктар экинчи, ал эми сербиялыктар үчүнчү болушту”, — деп айтылат маалыматта.
Бирок калыстар тобунун акыркы сөзү менен жыйынтык өзгөрүшү мүмкүн экени айтылууда.
Кыргызстандын куралдуу күчтөрү старшина Саламат Серкебаевдин командачылыгы алдындагы экипаждын курамында ат салышты.
Быйыл Танк биатлонунда 19 мамлекеттин өкүлдөрү күч сынашууда. Кыргызстандан таймашка үч кишиден турган төрт команда барган. Алардын жанында машыктыруучулар жана техникалык кызматкерлер бар.
Танк экипаждарынын жана аскер техникасынын мыктыларын аныктай турчу Танк биатлону жыл сайын Москвада өткөрүлүп келет. Кыргызстан бул мелдешке 2013-жылдан бери катышууда.
