БИШКЕК, 29-июл. — Sputnik. Жалал-Абад жана Ош облустарында камсыздандыруудан өткөн турак жай ээлерине акча тапшырылды. Бул туурасында Мамлекеттик камсыздандыруу уюмунун маалымат кызматы билдирди.
Каражаттын сертификаттарын аталган уюмдун төрайымы Жумагүл Эгамбердиева түштүк жергесине болгон иш сапары учурунда тапшырган.
"Майлуу-Суу шаарында жер көчкү жүрүү коркунучунан кооптуу деп табылган үч турак жайдын ээлерине бир миллион сомдон берилди. Ал эми өрт кырсыгы боюнча Кара-Сууда бир үй-бүлөгө 500 миң, Өзгөндө дагы бир жаранга 317 миң 750 сом тапшырылды", — деп айтылат маалыматта.
Мамлекет тарабынан ссуда берүү токтотулгандыгына байланыштуу Мамлекеттик камсыздандыруу уюму турак жайларды камсыздандыруудан өткөрүү зарылдыгын эскертет.
Айыл-кыштактагылар турак-жайга жылына 600 сом төлөп камсыздандырса, кийин камсыздандыруу уюму келтирилген чыгымдарды 500 миң сомго чейин төлөп берет. Ал эми шаардыктар жылына 1200 сом төлөсө, кийин бир миллион сомго чейин ала алышат.
