Анын "Таттуу кебездерди саткан апа" деп аталган сүрөтү сынактын кыска тизмесине кирип, онлайн добуш берүүгө катышкан. Анын жыйынтыгы менен Кадырбеков биринчи болду. Мындан улам сүрөттүн каарманы Жамбилхан Саипованы калаадан бир нече күн издеп таап, сөзгө тарттык.
Жамбилхан апаны табуу оңойго турган жок. Алгач, борбордогу Эркиндик бульвары менен өйдө чыгып жака белдеги таттуу кебез саткандардын баарын карап, аларга апанын сүрөтүн көргөзүп айла кетти. Бульвардын жолу карып, үмүт үзүлүп баратканда орундукта бейкапар самса жеп отурган улгайган аял көзгө илинди.
— Саламатсызбы? Бул сүрөттү таанып жатасызбы?
— Кышында тааныштар, тууган-уруктар интернетте "үстү-башың кар, эки жагыңа таттуу кебез таянган сүрөтүң жүрөт" деп айтып жүрүштү эле (сүрөткө үңүлүп). Ошондо бир көргөм.
— Учурда бул сүрөт көптөрдүн купулуна толуп, эл аралык фото журналистика сынагында ат салышып жатат. Бул тууралуу маалыматыңыз барбы?
— Ошол сүрөт тартылган күндү эстеп көрсөңүз?
— Жаңы жылга чукул декабрь айында "Сейтек" балдар борборунда окуучулар концерт койгону келишкен. Мен ал жакка балдар көп барса соодамды жакшылап өткөрүп алайын деп барсам, шамал аралаш бороон башталды. Концерт кыска убакытта жыйынтыкталып, соода болбой калды. Таттуу кебездерим өтпөй калды деп бир аз маанайым сууп кетип бараткам. Анын үстүндө кебездер шамалдан "калыбынан" кетип калат деп сарсанаа болдум. Чарчагандыктан улам тыныга дем алып келе жаттым, анан экинчи дем алганымда сүрөтчү бала "тартып коеюн" дегенинен, "макул" деп бир ирмем катып турдум.
— Канча жылдан бери таттуу кебез сатып иштейсиз?
— Ош шаарында 32 жыл тигүү цехинде иштедим. 2001-жылы Бишкекке келип татуу кебез саткандын эбин таптым. Жасалган жеринен 8 сомдон алып, 15 сомдон сатам. Күнүнө 50-100 даана таттуу кебез сатып, 600-700 сом табууга мүмкүнчүлүк бар. Жай мезгилинде түштөн кийин сатабыз, болбосо таттуу ысыктан улам кебездер калыбынан жазып кетет. Кышкы суукта таттуу кебездер жакшы сакталат.
— 16 жылдан бери таттуу кебез сатып келсеңиз, каражат жагы канааттандырабы?
— Өзүбүз карапайым үй-бүлөбүз. Пенсия курагында жумуш табуу кыйын. Абышкам мени менен кошо жеңил оюнчуктарды сатат. Төрт кыз, эки уулубуз бар. Уул үйлөп, үч кызыбызды турмушка бердик. Таттуу кебездин аркасы менен балдарымды багып, агарып-көгөрүп келем. Кичүү уул, кызыбыз студент. Аларга жардам кылышыбыз керек.
— Жумушуңуздун артыкчылыгы эмнеде?
— Таттуу кебезди таза абада, анан да сейил бакта жөө кыдырып сатам. Биздин куракта кыймылда болуу абдан пайдалуу. Анан да ар кандай адамдарды жолуктурасың…
