БИШКЕК, 20-апр. — Sputnik. Жакын арада туура эмес жерге токтотулган унаалар эвакуациялана баштайт. Тийиштүү токтомду өкмөт кабыл алды. Бул тууралуу Sputnik Кыргызстан агенттигине Кайгуул милиция башкармалыгынын жетекчиси Нур Сатыбалдиев билдирди.
Унааларды эвакуациялоо боюнча мыйзамга былтыр апрель айында кол коюлган. Ал эми өкмөт аны бир жылдан кийин мыйзам алдындагы актылар иштелип чыккан соң кабыл алган. Сатыбалдиевдин айтымында, эми техникалык иштер гана калды.
Эвакуацияланган жеңил унаа үчүн айдоочу компанияга 600-700 сом, жол тандабас — 2500 сом, жүк ташуучу унаага — 3,5 миңден 5 миң сомго чейин төлөнөт. Алдын ала эсептөөлөр айыл чарба техникалары үчүн дагы каралган — айып пул 10 миң сомго чейин чапчышы ыктымал. Мындан тышкары, эреже бузган айдоочу мамлекетке өзүнчө 1000 сом көлөмүндөгү айып пул төлөйт.
Жакынкы аралыкта негизги тарифтер иштелип чыгып, монополияга каршы органга жиберилет.
Кайсы жерде турган унаалар эвакуацияланат
Сатыбалдиевдин айтымында, унаалар "Эвакуатор" деген белги турган жерден гана эвакуацияланат. Мындай белгилер айрыкча соода борборлорунун алдыларына коюлат. Учурда белгилер коюла турган жерлерди аныктоо тапшырмасы берилди.
Унаа туруучу жай жана инструкция
Сатыбалдиевдин айтымында, эреже бузулганын аныктаган инспектордун аракетинин инструкциясы дагы иштелип жатат.
"Эвакуацияланган машина атайын унаа токтотуучу жайга алып барылат. Унаа ошол жерде тургандыгы үчүн дагы айдоочу ижара акысын төлөйт. Бирок алгачкы үч сааты бекер болот", — деди Сатыбалдиев.
Ал эми жеке менчик унаа токтотуучу жайлардын ээлери тегерегин бир стандартка келтирип, жарыктандыруу системасын киргизүү менен видео көзөмөл орнотуулары зарыл. Андан кийин гана алар менен тиешелүү келишим түзүлөт.
Шаарга канча эвакуатор керек
"Биз жарандын унаасын жабыркатпаш үчүн болгон күч аракетибизди жумшайбыз. Эвакуация учурунда унаа жабыркап калса, чыгымдарды фирма төлөп берет", — деди ал.
Атаандаштык жаратуу үчүн 3-4 компания менен келишим түзүү пландалып жатат. Алгач шаарда 16 эвакуатор пайда болот.
Маалыматтык кампания
Сатыбалдиевдин айтымында, унааларды эвакуациялоо май айынын акырында тесттик режимде башталат. Ага чейин жеке компаниялар менен тийиштүү келишимдерге кол коюлат.
