Кетти! Бабанов саясаттан жана депутаттыктан баш тарткан себебин айтты

БИШКЕК, 30-дек. — Sputnik. "Республика — Ата-Журт" фрациясынын лидери Өмүрбек Бабанов депутаттык мандатынан баш тартып, саясаттан кетерин билдирди.

Бабановдун бул билдирүүсүн аталган партиянын штабы таратты.

Бабановдун айтымында, ал президенттик шайлоонун алдында командасына эгер көпчүлүктүн колдоосуна ээ боло албай калса, саясаттан кетем деп убада берген.

"Мындай чечим мен үчүн жеңил болгон жок, бирок азыркы кырдаалда жападан жалгыз туура чечим болду деп эсептейм. Ошондой эле Жогорку Кеңештеги депутаттык мандатымды да тапшырам. Партиябыздын тизмесиндеги кийинки талапкер депутат болот. Бул адилеттүүлүктү, акыйкатты орнотууга жол ачат. Өзгөчө ыраазычылыгымды ооматта да, оор учурда да, мага ишеним корсөткөн, мени колдогон командама, партиялаштарыма жана тарапташтарыма билдирем", — деди ал.

Ошондон эле Бабанов бийликтен анын командасын саясий куугунтуктоого албоосун суранган.

Эске салсак, ушул жылдын 4-ноябрь күнү Өмүрбек Бабановго карата Башкы прокуратура Кылмыш жаза кодексинин конституциялык түзүмдү күч менен басып алууга чакырык жасоо жана улуттар аралык, расалык же диний кастыкты козутуу беренелери боюнча кылмыш иши козгогон. Ошол күндөрү депутат ден соолугун чындоо максатында чет өлкөгө кеткени айтылган. 

Ал эми 13-ноябрь күнү Өмүрбек Бабанов өз ыктыяры менен фракциянын лидерлигинен кеткен.