БИШКЕК, 21-дек. — Sputnik. Курал менен итин атып өлтүргөн бала окуяга түшүндүрмө берди.
Буга чейин Kaktus.media порталы итти атып өлтүргөн уландын видеосун жарыялаган. Портал видеону Арген Шерматов аттуу Instagram колдонуучунун баракчасынан алганын жазган.
Sputnik Кыргызстан агенттигинин кабарчысы Шерматов менен байланышканда чынында эле итин атып өлтүргөнүн моюндады. Окуя Жалал-Абаддын Сузак районундагы айылдардын биринде, өз үйүндө болгонун айтты.
"Бул мындан үч-төрт ай мурда болгон. Ит айылдагыларга зыян келтиргени үчүн аттым. Ал кошуналардын тоокторун жеп, адамдарга тиш салган. Өзүбүз да ага жакын жолой албай калганбыз. Соңку күндөрү кутурма менен ооругандай белгилерди байкай баштадым. Жөн жерден жаныбар өлтүргүдөй, мен деле жинди эмесмин да. Ал алабай тукумундагы ит болчу. Жазда 200 долларга сатып алгам", — деп жооп берди Шерматов.
Ал эми итти аткандан кийин мыйыгынан жылмайганынын себебин көйгөй жараткан иттен кутулуп жеңилдей түшкөнү менен түшүндүрдү.
Жалал-Абад облусттук ИИБдин маалымат кызматы окуя боюнча териштирүү иштери жүрүп жатканын билдирди.
Арген Шерматов 21 жашта. Ал буга чейин Кытайдан билим алып келгенин айтты.
