Шаар тургуну атасынын мылтыгы менен унаасын сактап, ууруну кармап калды

БИШКЕК, 19-июн. — Sputnik. Бишкектин тургуну куралдын жардамы менен унаасын алып калганын ШИИБ билдирди.

Маалыматка ылайык, кол салуу 18-июнь күнү кечки саат 10дор чамасында Тюмень көчөсүндө жайгашкан үйдө болгон. Окуя болгон жерге барган ыкчам тобуна үй ээси кылмышкерлер анын машинасын уурдап кетүүгө аракет кылгандарын айтып берген.

Анын айтымына караганда дүкөнгө чыккан кожоюн үйгө досу менен кайтып келе жатып, короонун эшиги ачылып калганын байкаган. Кирип Mercedes Benz үлгүсүндөгү унаа от алганына күбө болот.

Рулда отурган киши үй ээсин байкап, бычак менен коркутуп көчөгө качып чыккан. Кожоюн эшикти бекитип, атасынын аңчылык мылтыгы менен "меймандарды" күтө баштаган.

Болжол менен 40 мүнөт өткөндө ууру дагы бир шериги менен дарбазадан үйдүн короосуна секирип түшүп, кол салышкан. Коргонуп жаткан үй ээси кылмышкерлердин бирөөсүн бутка аткан. Бирок алган жаракатына карабай кайрадан асыла баштаган кишини кожоюн мылтыктын кундагы менен бир чаап кулаткан. Бул учурда экинчи ууру качып кетүүгө үлгүргөн.

Ушундан кийин милиция келген. Колго түшүрүлгөн жаран шаардын 18 жаштагы тургуну болуп чыкты. Ушу тапта ал ооруканада жатат.

Аталган факт боюнча чогултулган материалдар Биринчи Май РИИБГе өткөрүп берилди, кол салгандардын экинчиси изделип жатат.