БИШКЕК, 6-сен. — Sputnik. Кыргыз дизайнери Марсель Шейшеновдун бамбуктун формасындагы суусундук банкасынын дизайны (Bamboo) Россияда болгон Fakestival фестивалында "Мыкты таңгак" номинациясында жеңишке жетишти. Бул тууралуу фестивалдын сайтына жазылды.
"Бул банкаларды бири-биринин үстүнө тизип койсоң, кадимки бамбукту элестетип, алыстан эле көзгө урунат. Башка банкаларды канчалык тизсең дагы мындай бирдиктүү образ бере албайт", — деп жазган фестиваль уюштуруучулары.
Sputnik агенттиги дизайнердин өзү менен байланышканда, ал бул фестивалга бир нече жылдан бери катышып келе жатканын айтты.
Дизайнер Sputnik Кыргызстан агенттигине мурдарак берген интервьюсунда бул дизайндын идеясы бир жыл мурда келгенин билдирген. Ошондой эле анын эмгегин көргөн кытай жарандары "Бамбук — биздин маданиятыбыздын туу чокусу. Өзүбүз дүйнөдө лидер болуп туруп, эмнеге мындай дизайнды бизден башка бирөө жасады?" деп өздөрүн ыңгайсыз сезип пост жазгандарын кошумчалаган.
Fakestival — 2010-жылдан бери өткөрүлүп келе жаткан чексиз креатив эл аралык фестивалы. Чыгармачыл жана жаңыча көз караштагы жаштарды колдойт.
