23:55 23 Бирдин айы 2018
Түз эфир
Гүлдөр жана периште символу. Архив

Амансызбы, бурадар. Өлкөдө 10:15. Өлүмгө жетпегир. Ажалына тыпылдап басып баратыптыр

© Sputnik / Антон Круглов
Бурадар
Кыскача шилтеме алуу
213 0 0

Жакшы жатып, жай турдуңузбу, мекендеш. Амандыгыңызга ишенем, бирок көптөрдүн жай көңүл менен тургандыгына күмөнүм бар.

Акыркы күндөрдүн нылдай ныгыра баскан окуялары көңүлдү кирдетип турган чагы. Эртең менен жакшы сөз оозангыла дей чыгарсыз, окурман. Ишигылып, көңүл жылып, жарк дей албай турган бир маанайлар.

Эки күндөн бери ичти эңшерген кабарлар кайдыгер калтырбай турган чак.

Кечээ биздин редактор Эркин Алымбеков жаны чымчык болуп учуп кеткен бөбөктүн катын жазып, ааламды аңтарып салды. "Мен сени аябай жакшы көрөм, сени кучактап, өөп, жытыңды искегим келет. Бирок сени таппай, каякта экенимди түшүнө албай жатам. Чакырсам эмнеге келбей жатасың?"… дептир айыпсыз наристе.

Энеси эмне болуп жатты экен… ага айта турган сөз көп… бирок ага корогон кайран кеп…

Өлүмгө жетпегир. Ажалына тыпылдап басып баратыптыр. Кызын жакшынакай кылып кийинтип алган экен… Өзүң өлүп кете бердиң, бел кырчоосунан алдый бинтке таңылып кызың калды. Ооруканага түшкөн бөбөктүн бир бутун кесүүгө туура келиптир.

© предоставленное очевидцем видео с камеры наблюдения
Өлүмгө чейинки секундалар. Кызын көтөрүп бараткан келинди бус коюп кетти

Бала бакчанын тепкичинен кечээ дагы бир бала кулап кеткенин айтышты. Беш жаштагы бөбөктүн мээси чайкалды, учурда абалы туруктуу деди дарыгер. Жакшы болуп кетсин.

Жүрөк жегиси келет, мээ жегиси келет, ал эми азыркылар туздалган бадыраң эңсейт. Курсактагы бала төрөлгөнгө чейин… талгакты жандыруу эмес, кандыруу керек. Бул ааламга келе жаткан баланын сапары.

Уул төрөлдү, кыз жарыкка келди. Сүйүнчүңүз даяр. Мамлекет ымыркай төрөлгөндө 4 миң сом өлчөмүндө акча берет. Азыр аны 327 үй-бүлө алыптыр. Көз жардыңызбы, ата болдуңузбу, анда сүйүнчү пулуңузду алыңыз. Алды кийин укпаган болсоңуз, бул маалыматты окуп коюңуз.

Валюта наркы. Сомдун баасы долларга карата орто эсеп менен 68.02 (сатып алуу) жана 68.33 (сатуу) сомду түздү.

Мунай баасы. Бишкекте орточо эсеп менен алганда АИ-95 үлгүсүндөгүсү 44.40 сом, АИ-92 үлгүсүндөгүсү 41.50 сом, ал эми дизель жөнөкөй майы 42.00, ал эми кышкы дизель майы 46.50 сомдон сатылууда.

Соңку сөз: Аман бололучу, асты адам бололучу…

Иш күнүңүздөр ийгиликтүү өтүшүн каалап, Нургүл Максутова

Белгилер:
Бурадар, валюта, аба ырайы, Мунай, Кыргызстан
Колдонуу эрежелериПикирлер

ЭҢ МААНИЛҮҮ