БИШКЕК, 26-дек. — Sputnik. Социалдык тармактарда Казакстандын эки миңден ашуун мамлекеттик кызматкеринин ичимдик ичип, сөгүнүп жүргөн жана эротикалык сүрөт, видеолору табылды. Бул туурасында Sputnik Казакстан агенттиги Коррупцияга каршы күрөшүү жана мамлекеттик кызматтардын ишине мониторинг жүргүзүү боюнча агенттигине таянуу менен жазды.
Ведомствонун маалымат кызматы билдиргендей, жыл башынан бери 54 745 мамлекеттик кызматкердин аккаунту текшерилген. Алардын ичинен 2 212 кызматкердин аккаунтунан адепсиз делген 2300 сүрөт, 21 видео жана 46 комментарий аныкталган.
Мындан сырткары, жыл башынан бери социалдык тармактарда өзүн адепсиз алып жүргөн 277 мамлекеттик кызматкер дисциплинардык жоопкерчиликке тартылган. Ошондой эле жумуш убактысы бүткөндөн кийин кызматтык унааны колдонгону үчүн 112 аткаминер жазаланган.
