БИШКЕК, 25-апр. — Sputnik. Бишкекте бак-дарактарга зыянкечтерден коргоочу дары каражаттары чачыла баштайт. Бул тууралуу мэрия билдирди.
Маалыматка ылайык, "Бишкек жашыл курулуш" муниципалдык кызматы бүгүн түндөн баштап дарактарга комплекстүү дары чачууну баштап, иш 15-майга чейин уланат.
"Дарылоо негизинен түнү жүргүзүлөт. Мындай график шаар тургундарына ыңгайсыздык жаратпоого жана айлана-чөйрөгө тийгизген таасирин азайтууга багытталган. Адамдардын, жаныбарлардын ден соолугуна зыян келтирбеген заманбап, коопсуз препараттар колдонулат", — деп айтылат маалыматта.
Шаар администрациясы тургундарды ага карабастан иш жүрүп жаткан аймактарга убактылуу сейилдөөгө чыкпай турууга чакырат. Айрыкча химиялык заттарга аллергиясы бар адамдар этият болууга тийиш.
Мэрия дарактарды дарылоо Химиялаштыруу жана өсүмдүктөрдү коргоо департаменти менен биргеликте жүргүзүлөрүн кошумчалады.