БИШКЕК, 16-май — Sputnik. Ысык-Көл облусунун Ак-Суу районуна караштуу Жыргалаң, Ак-Булак жана Боз-Учук чокуларында салына турган тоо-лыжа курортундагы жерлер аукцион аркылуу сатыла баштайт. Бул тууралуу президент Садыр Жапаров соцтармактагы баракчасы аркылуу билдирди.
Анын айтымында, аталган курорт мындан ары "Ала-Тоо резорт" деп аталып, 2028-жылы толук ишке берилет.
Өлкө башчы курорттогу отель, ресторан жана башка объектилер салынуучу жерлерди аукцион аркылуу сатып, андан түшкөн каражат менен курулуштун 2-3-фазалары бүткөрүлөрүн белгиледи. Ал эми 1-фазасы мамлекеттик бюджеттин эсебинен курулмакчы.
"Жыргалаң участогундагы биринчи асма жол кийинки жылдын июлунда бүтөт. Демек, 2026-жылдын декабрында биринчи фазасы (Жыргалаң) аяктап, лыжа трассалары ишке берилет. 2027-жылы экинчи фазасы (Ак-Булак) жыйынтыкталып, 2028-жылы үчүнчү фазасы (Боз-Учук) бүтөт да, үч тоонун трассалары биригип, толук кандуу иштей баштайт. Жалпы "Ала-Тоо резорт" трассасынын узундугу 250 чакырымды түзөт", — деп жазган Жапаров.
Президенттин айтымында, жерди сатып алгандар үчүн документтерди мамлекет даярдап берет, ишкерлер эки жылдын ичинде курулушту бүткөрүшү керек.
Жапаров алгачкы аукцион июндун башында болорун айтып, инвесторлорду катышууга чакырган.