БИШКЕК, 25-сен. — Sputnik. Кыргызстанда педиатр, гематолог, неонатолог сыяктуу адистер тартыш. Бул тууралуу саламаттык сактоо министринин орун басары Медербек Исмаилов Евразия билим берүү көргөзмөсүндө билдирди.
Ал белгилегендей, жаштар санитардык дарыгер кесибин да тандай бербейт.
"Кыргызстанда медициналык жогорку окуу жайлар арбын. Анда көбүнчө Индия жана Пакистандан келген чет элдик студенттер билим алышат. Ата мекендик адистерди Медициналык академия, Жалал-Абад жана Ош мамлекеттик университеттери даярдайт. Бирок алыскы аймактарда адистер жетишсиз. Гематолог, неонатолог, педиатр сыяктуу кесиптерге кызыккан адистердин жетишсиздиги чоң маселе жаратууда. Эпидемиологдор жана санитардык дарыгерлер боюнча да ушундай эле көйгөйлөр бар. Анын себеби жашоо шарттары жана төмөнкү эмгек акы болууда", — деди Исмаилов.
Министрдин орун басары белгилегендей, Кыргызстанда медициналык адистер көп даярдалганы менен алардын бардыгы мамлекеттик медициналык мекемелерге жумушка орношпойт.