Онлайн-мектепте ден соолугуна байланыштуу мүмкүнчүлүгү чектелгендерге, мигранттардын балдарына, спорт, музыка менен алектенип, сыртка көп чыга турган окуучуларга артыкчылык берилет. Бул тууралуу Лира Самыкбаева Sputnik Кыргызстан радиосуна маек куруп жатып билдирди.
Анын айтымында, мындай мектептерде кадимки билим жайларынан иштеген, санарипти өздөштүргөн мугалимдер да иштесе болот.
"Жыл башында атайын жумушчу топ түзүлүп, онлайн-мектептин жобосу иштеле баштаган. Мисал катары ар түрдүү мамлекеттердики каралды. Бирок негизинен Улуу Британиядагы Му schooling онлайн-мектеби менен иштештик. Мында баланы коомдон алыстатуу боюнча да кооптуу маселелер бар экен. Мисалы, азыр диний көз караштагы айрым ата-энелер кыздарын мектептен окутуудан баш тартып жатат. Ушул балдардын кадимки мектептен чыгып, болбогон шылтоо менен аралыктан окуп калышы да жакшы эмес көрүнүш. Пандемия учурунда баланын сабакка барышы канчалык маанилүү экенин билдик. Окуучу кадимки билим жайда социалдашып эле тим болбостон, башка балдар менен мамиле түзгөндү үйрөнөт. Ошол себептен көпчүлүк ата-энелер кадимки мектепти тандаса керек. Ал эми диний көз караштар менен кыздарды сабакка жибербей онлайн-мектеп менен чектей турган болсо, бул жагы да текшерилип турат. Ал үчүн онлайн-окууга техникалык шартын, атайын окуу бөлмөсүн ата-эне даярдашы керек. Ал эми мугалимдерди алгач мамлекет камсыздайт. Билим берүү процессин уюштуруунун тартиби атайын жободо жазылган. Окутуунун ар кандай синхрондуу (бардык балдар онлайн-режимде кошулганда) жана ассинхрондук (алдын ала даярдалган видеоматериалдар аркылуу иштешүү) варианттары каралган. Эгер айылдарда жарык өчүп же окуучунун интернети кайсы бир себептер менен иштебей калса, ата-эне алдын ала себебин түшүндүрүп суранышы керек. Бала он жолу сабактан себепсиз калса окуудан чыгарылат", — деди Лира Самыкбаева.
Ал онлайн-мектептин мугалимдеринин маянасы кадимки мектептерге караганда жогору болорун кошумчалады.