БИШКЕК, 7-авг. — Sputnik. Кадамжай районуна (Баткен облусу) караштуу Ничке-Суу кенинен алтын рудасын мыйзамсыз ташыган төрт киши кармалганын УКМКдан билдиришти.
Атайын кызмат маалымдагандай, алар апрель айынан тарта июлдун соңуна чейин лицензиясыз эле алтын руданы үй шартында иштетүү максатында ири өлчөмдө жашыруун алып чыгып турушкан.
Тергөө-иликтөө кендин аймагынан тереңдиги беш метрге чейин, туурасы үч, узундугу 57 метр жер казылганын аныктаган.
Июлдун соңунда Баткен райондук сотунун чечими менен алар кармалып, эки айга тергөө абагына отургузулган.
Учурда бул ишке тиешеси бар башкаларды табуу жана чыгымдын көлөмүн аныктоо боюнча иликтөө жүрүп жатканын айтышты.