БИШКЕК, 17-май — Sputnik. Президент Садыр Жапаров БУУнун башкы катчысынын орун басары – БУУнун Терроризмге каршы башкармалыгынын башчысы Владимир Воронковду кабыл алды. Бул тууралуу мамлекет башчынын маалымат кызматы билдирди.
Жолугушуунун жүрүшүндө Кыргызстан менен БУУнун ортосундагы кызматташтыктын актуалдуу маселелери боюнча пикир алмашуу болду. Жапаров Кыргызстан терроризмди айыптап, БУУнун Глобалдык контртеррористтик стратегиясын ишке ашырууга активдүү катышып жатканын баса белгиледи.
"Баарлашуунун жүрүшүндө президент 2027-2028-жылдарга БУУнун Коопсуздук кеңешинин туруктуу эмес мүчөлүгүнө Кыргызстандын талапкерлигин көрсөтүү тууралуу айтып берди. Шайлоо БУУнун Башкы ассамблеясынын 80-сессиясында 2026-жылдын июнь айында өтөт", — деп айтылат маалыматта.
Өз кезегинде Воронков Кыргызстандын БУУнун Коопсуздук кеңешинин туруктуу эмес мүчөсү болууга жакшы мүмкүнчүлүктөр бар экенин белгиледи.