БИШКЕК, 12-апр. — Sputnik. КМШнын ТИМ жетекчилеринин кеңешинин катышуучулары бүгүнкү отурумда эл аралык террорчулук менен күрөшүүдө күчтөрдү бириктирүү зарылдыгын белгиледи. Бул туурасында Шериктештиктин башкы катчысы Сергей Лебедев айтканын РИА Новости жазды.
© Sputnik / Виктор Толочко
/ "Сүйлөгөндөрдүн баары (тар форматтагы жолугушуу — ред.) терактыга ("Крокус сити холлдогу" — ред.) байланыштуу Россия тарапка көңүл айтып, эл аралык террорчулук менен күрөштө биздин күчтөрүбүздү бириктирүү зарылдыгын белгилешти", — деген башкы катчы.
Лебедевдин айтымында, жыйындын катышуучулары террорчулук улутка карабастыгын белгилешкен.
"Терактыны колдонуу менен өлкөбүздөгү элди бөлүп-жарууга жасалган кандай гана аракеттер болбосун каршы турушубуз керек. Террорчулук менен күрөшүүдө күчтөрдү бириктирип, өз ара иш алып баруу, кызматташууну активдештирүү сунушун Шериктештиктеги өлкөлөрдүн делегация башчылары колдоду", — деген Лебедев.
Эске салсак, Минскиде КМШ өлкөлөрүнүн ТИМ башчыларынын кеңешинин жыйыны өтүп, алар ар кыл тармактагы кызматташуу маселелерин талкуулашкан. Кийинки жыйын 7-октябрда Москвада болмокчу.