БИШКЕК, 18-фев. — Sputnik. Бишкекте коомдук жайда адамдардын өзүн алып жүрүү маданиятын калыбына келтирүү керек. Бул тууралуу министрлер кабинетинин төрагасы Акылбек Жапаров билдирди.
"Мен Бишкектеги университетке тапшырганда ректор борбор калаада адам өзүн кандай алып жүрүшү керектиги тууралуу лекция окуган. Түкүрбөгүлө, бут кийимди таза кармагыла, троллейбуска кир кийим менен отуруп элди чочутпагыла деп айткан эле. Троллейбуска отурарда бут кийимибизди тазалап, кийимибиз кир болсо жөө кетчүбүз. Бишкекке ошол атмосфераны кайтаруу керек. Адамдар борбор калаага келгенин сезиши зарыл. Мен шаардын чок ортосунда чемичке, самсы жана башкаларды сатпаш керектигин көп эле айтып келем. Аянтта жакшынакай иш-чара өткөндөн кийин "Тазалык" 40 тонна таштанды чыгарды. Уят да. Башка мамлекеттерде адамдар таштандыны өздөрү менен кошо ала кетишет", – деген өкмөт башчы.
Жапаров борбор калаада тазалыкты, коомдук коопсуздукту, шаардын эстетикалык көрүнүшүн сактоонун өзгөчө тартибин киргизүү зарылчылыгы турганын кошумчалаган.