БИШКЕК, 28-ноя — Sputnik. Эл аралык финансы институтунун (IIF, АКШ) башкы экономисти Робин Брукс Германиядан автоунаа жана тетиктерди Кыргызстанга жеткирүү кескин жогорулаганын соцтармак аркылуу билдирген.
Анын айтымында, Германиядан Кыргызстанга автоунаа жана тетик экспорту 2023-жылдын 24-февралынан бери 5 500 пайызга өскөн.
"Мунун баары Россияга жөнөтүлүп жатканын түшүнүү үчүн укмуш акылдын деле кереги жок. Бул Кыргызстанда машина алгандар кескин көбөйүп кетти дегенди билдирбейт. Германия муну токтотушу керек", — деген ал.
Мындай чагымчыл постко министрлер кабинетинин төрагасынын орун басары Эдил Байсалов жооп берген. Ал Кыргызстандын экономикасындагы өсүш реалдуу экенин билиш үчүн анча көп акылдын деле кереги жок экенин айткан.
"Баары силер ойлогондой эмес. Жакшы башкаруу менен олуттуу реформа жасадык (тагыраагы, уурдаган жокпуз)", — деп жазган Байсалов.